शासकीय कर्मचा-यांच्या नियतकालीक बदल्या- मार्गदर्शक तत्वे

शासकीय कर्मचा-यांच्या नियतकालीक बदल्या-
संदर्भांतील मार्गदर्शक तत्वे.


महाराष्ट्र शासन
कृषि,पशुसंवर्धन, दुग्ध व्यसाय विकास व मत्स्यवसाय विभाग
शासन परिपत्रक क्रमांक-संकीर्ण.१००६/६२४५/प्र.क्र.५९/पदुम-१७
मंत्रालय विस्तार, मुंबई-४०००३२.
दिनांक- ३१ ऑक्टोबर, २००६


वाचा- महाराष्ट्र शासकीय कर्मचा-यांच्या बदल्यांचे विनियमन आणि शासकीय कर्तव्ये पार पाडतांना होणा-या विलंबास प्रतिबंध अधिनियम,२००५ या विषयाबाबतची सामान्य प्रशासन विभागाची दि.२५ मे,२००६ ची अधिसूचना.

परिपत्रक

शासकीय कर्मचा-यांच्या नियतकालीक बदल्यासंदर्भांतील शासनाने महाराष्ट्र शासकीय कर्मचा-यांच्या बदल्यांचे विनियमन आणि शासकीय कर्तव्ये पार पाडतांना होणा-या विलंबास प्रतिबंध अधिनियम २००५ दिनांक १ जुलै २००६ पासून अंमलात आणला आहे.

अधिनियमाच्या कलम-३(१) नुसार अधिकारी/कर्मचा-यांच्या नेमणुकीचा कालावधी ३ वर्षाचा आहे. कलम-४(१) नुसार बदलीच्या पदावरील म्हणजे ३ वर्षाचा कालावधी पूर्ण केला असल्याखेरीज सामान्यपणे त्यांची बदली करता येणार नाही.

२. हा अधिनियम शासकीय अधिकारी/कमर्चा-यास जशास तसा लागू राहील. या अधिनियमास कोणतीही बाधा न आणता खालील मार्गदर्शक तत्वांची अंमलबजावणी शक्य तितक्या प्रमाणात पशुसंवर्धन दुग्धव्यवसाय आणि मत्स्यव्यवसाय विभागातंर्गत कार्यरत असलेल्या कमर्चा-यांसाठी करण्यांत येईल.

अ) किती बदल्या ?
ज्या कर्मचा-यांच्या सेवा त्या पदावर ३ वर्षे झाली आहे, त्यांनाच बदलीपात्र समजण्यात येईल.

बदलीपात्र कर्मचा-यांची कार्यरत पदावरील सेवाज्येष्ठता लक्षात घेऊन विभाग निहाय/राज्यस्तरीय यादी करण्यांत यावी. त्यापैकी एकूण पात्र पैकी ३०%कर्मचा-यांचीच बदली करण्यांत यावी.

आ) बदलीची पध्दत
क) सेवानिवृत्तीस २ वर्षे बाकी असतांना कर्मचा-यांच्या विनंतीनुसार बदली करण्यांत यावी. शक्यतो मागितलेल्या ठिकाणचे मुख्यालय किंवा जवळपासच्या भागात बदली करण्यांत यावी. विनंती नसल्यास बदली करु नये.

ख) पती-पत्नी एकत्रिकरणानुसार बदली करावी.

ग) मतीमंद मुलांच्या म्हणजे अंध,अपंग व मुक-बधीर पाल्यांच्या पालकांची बदली त्यांच्या विनंतीप्रमाणे करावी.

घ) प्रत्येक कर्माचा-यांची दहा-दहा वर्षात नक्षलग्रस्त आदिवासी भागात बदली करावी. वर्ग-२,३,४ मधील महिलांची शक्यतो नक्षलग्रस्त भागात बदली करु नये.

ड) आदिवासी/नक्षलग्रस्त भागात २ वर्षे काम केलेल्या कर्मचा-याची त्याच्या पसंतीच्या ठिकाणी बदली करावी.

च) सर्व कर्मचा-यांना एकूण ३० वर्षाच्या सेवेत शक्यतो २ वेळा पसंतीच्या पदावर बदली करावी. साधारणत: पहिल्या २५ वर्षात एकदा व दुस-या २५ वर्षात, याप्रमाणे बदली करावी.

छ) वर्ग-३ च्या कर्मचा-यांकरिता ६ वर्षापर्यंत मुख्यालयाबाहेर बदली करण्यांत येऊ नये. ६ वर्षानंतर मुख्यालयात बदली करावी, परंतु जिल्हा बदलू नये.

ज) वर्ग-३ च्या कर्मचा-याकरिता १० वर्षानंतर त्यांची बदली जिल्हाबाहेर करण्यांत यावी. परंतु महिला कर्मचा-यांच्या बदल्या जिल्हाबाहेर करण्याची गरज नाही.

झ) वर्ग-४ च्या कर्मचा-याबाबत शक्यतो त्यांची जिल्हयाबाहेर बदली करु नये, परंतु विनंती केली असल्यास विचार करावा.

३. वरील मार्गदर्शक तत्वांमध्ये काहीही अंतर्भूत असले तरी-
अ) विनंती असल्यास बदलीचा विचार करावा.

ब) कर्मचा-याविरुध्द विभागीय चैकशी (विभागीय चौकशी नियम-८ खालील) चालू असेल तर प्रशासकीय निर्णय घेऊन बदली करावी.

क) काही कर्मचा-यांची प्रशासकीय सोयासाठी बदली करणे अपरिहार्य असेल तर अशा कर्मचा-यांची बदली करण्यांत यावी.

४. वरील बदल्यासंदर्भातील मार्गदर्शक तत्वे महाराष्ट्र शासनाच्या अधिनियमात कोणतीही बाधा न आणता शक्य तितक्या प्रमाणात अंमलात आणण्यात यावी.

५. राजकीय दबाब आणणारे अधिकारी/कर्मचारी सामान्य प्रशासन विभागाच्या परिपत्रक क्र.सीडीआर.१००६/प्र.क्र.१२/०६/अकरा, मंत्रालय, मुंबई दि.१७.०८.२००६ नुसार कारवाईस पात्र असतील.

६. हे आदेश कृषी व पदुम विभागाअंतर्गत आयुक्त,पशुसंवर्धन, आयुक्त,दुग्धव्यवसाय व आयुक्त,मत्स्यव्यवसाय यांच्या अखत्यारितील वर्ग-३ व वर्ग-४ च्या कर्मचा-यास लागू करण्यांत येत आहेत. याची अंमलबजावणी आयुक्त,पशुसंवर्धन, आयुक्त,दुग्धव्यवसाय व आयुक्त,मत्स्यव्यवसाय यांनी करावी.

महाराष्ट्राचे राज्यपाल यांच्या आदेशानुसार व नांवाने,



सही/-
( सु.ना.पवार )
कार्यासन अधिकारी,महाराष्ट्र शासन,
कृषि,पशुसंवर्धन,दुग्धव्यवसाय विकास व मत्स्यव्यवसाय विभाग

प्रति,-
आयुक्त, पशुसंवर्धन, महाराष्ट्र राज्य, पुणे
सह आयुक्त, पशुसंवर्धन(मुख्यालय), महाराज्य, पुणे
आयुक्त, दुग्धव्यवसाय विकास, महाराष्ट्र राज्य, वरळी, मुंबई
उप आयुक्त(प्रशासन), दुग्धव्यवसाय विकास, महाराष्ट्र राज्य, वरळी, मुंबई
आयुक्त, मत्स्यव्यसाय, महाराष्ट्र राज्य, मुंबई